Saud Arabystanynyň mirasdüşer şazadasy Muhammet ben Salman al Saud 2024-nji ýyla çenli Neom innowasiýa şäheriniň gurluşygynyň taslamasynyň çäklerinde Sindala adasynda dynç alyş merkezini döretmek meýilnamasy barada mälim etdi. Bu barada “Al-Arabiýa” teleýaýlymyna salgylanyp, bigasia.ru habar berýär.
“Sindala Neomyň çäginde ilkinji dynç alyş merkezi we Gyzyl deňizde ýahta syýahatçylygynyň merkezi bolar” – diýip, mirasdüşer şazada belledi. Ol bu taslamanyň durmuşa geçirilmeginiň “Vision-2030” maksatnamasynyň çäklerinde patyşalykda syýahatçylyk pudagynyň ösmegine ýardam etjekdigini sözüniň üstüne goşdy.
Teleýaýlymyň habar bermegine görä, 840 müň inedördül metr meýdany bolan Sindala adasynda 86 duralga ýeri bolan gämi duralgasyny, şeýle-de suwa düşülýän kenarlary, ýahta klublary, premium otaglary bolan myhmanhanalary we apart-otelleri gurmak meýilleşdirilýär. Barly myhmanlara golf oýnamak üçin meýdançalar we restoranlarda deňze çykýan görnüş bilen aýratyn menýu hödürlener. Täze dynç alyş merkezi 3500 adamy iş bilen üpjün eder.
Neom Müsür we Iordaniýa bilen serhet zolagynda, Gyzyl deňziň kenaryndaky Tabuk welaýatynda 26,5 müň inedördül kilometr meýdanda gurulýan megapolisdir. Dörediljekdigi barada 2017-nji ýylda yglan edilen innowasiýa şäheri diňe Gün we ýel energiýalaryny ulanar. Bu taslama dünýäde nebitiň bahasynyň düýpli peselmeginiň esasynda 2016-njy ýylda kabul edilen “Vision-2030” strategiki maksatnamasynyň çäklerinde durmuşa geçirilýär. Onuň esasy maksatlarynyň biri Saud Arabystanynyň ykdysadyýetini diwersifikasiýalaşdyrmakdan we çig mal däl pudaklary ösdürmekden ybarat.
