Oguzhan adyndaky «Türkmenfilm» birleşigi «Ýiten top» atly täze üç ölçegli multfilm önümçiliginiň ýene birini tamamlap, köpçülige hödürledi. Bu multfilm dört ýaşdan ýokary çagalara niýetlenip Mämmetjanyň başdan geçirmeleriniň 4-nji seriýasy bolup durýar. Bu barada turkmentv.gov.tm habar berýär.
Bilşimiz ýaly, Mämmetjan milli gahryman hökmünde dürli wakalaryň üsti bilen çagalara özüňi alyp barmagyň nusgalyk göreldesini görkezýär. Ine bu gezek hem her bir ýönekeý hadysalaryň aňyrsynda giň manylaryň bolşy ýaly Mämmetjan ýiten topy tapmagy bilen başlaýan waka duçar bolýar.
Ýurdumyzyň Bitaraplyk baýramçylygynyň öňi syrasynda «Ýaşlyk» teleýaýlymynda ýaýlyma beriljek bu multfilm Oguzhan adyndaky Türkmenfilm birleşiginiň döredijilik toparynyň baýramçylyk sowgady hökmünde halkymyza hödürlener. Röwşen Welmiýewiň režissýorlyk etmeginde taýýarlanan bu multfilme turkmentv.gov.tm hem-de aydym.com saýtlaryndan tomaşa edip bilersiňiz!
