ABŞ ahyrsoňy Artemis maksatnamasynyň birinji döwrüne girişýänçä we onuň çäklerinde 2025-nji ýylda astronawtlaryň Aýa dolanmagyna garaşylýarka, täze maglumatlara görä, Hytaý edil şol möhletiň içinde diýen ýaly Aýda baza gurmagy meýilleşdirýär.
Hytaýyň häzirki meýilnamalarynyň çäklerinde biziň Ýeriň hemrasynda bazany eýýäm 2028-nji ýyla çenli döretmek meýilleşdirilýär. Ýöne munuň özi ony gurmaga has irräk başlamaly boljakdygyny aňladýar.
Stansiýa ýadro reaktory bilen işlär.
«Häzir biz Aý stansiýasynyň energiýa bolan uzakmöhletleýin talabyny kanagatlandyrmakda ýadro energiýasyny ulanýan täze ulgamy işläp taýýarlaýarys» — diýip, Hytaýyň Aýy öwrenmek maksatnamasynyň baş işläp taýýarlaýjysy Bu Weýžen aýtdy.
Hytaýyň Aý bazasynyň niçik boljagy entek anyk däl, desga adamlaryň ol ýerde näçe wagtlyk bolmagy üçin niýetlenen — ol barada-da hiç zat aýdylmaýar. Gürrüňiň gonuş moduly, haýsydyr bir bunker, lunohod we orbital stansiýa barada gidýändigi belli.
Şeýle-de, owal şeýle bazany işledýän ýadro gurluşynyň kuwwaty 1 MWt-a çenli ýetip biljekdigi barada maglumat bolupdy.
Öň ABŞ-da hem 2030-njy ýyla çenli Aýda ýadro gurluşynyň ýerleşdiriljekdigi barada aýdylýardy. Şeýlelik bilen, Aýy özleşdirmek boýunça ýaryşyň barha artýan depginini nazara alsaň, eýýäm ýene 10 ýyldan ol ýerde, hakykatdanam, heniz astronawtlaryň uzak wagtlyk ýaşamagy üçin niýetlenmedigem bolsa, iki bazanyň peýda bolmagy mümkin.
