Fransiýaly Stefani Frappar futbol boýunça dünýä çempionatynyň toparlaýyn tapgyrynyň üçünji tapgyrynyň Germaniýa bilen Kosta-Rikanyň milli ýygyndylarynyň arasyndaky oýnuna bellendi we dünýä birinjiliginde esasy emin hökmünde işleýän ilkinji zenan bolar. Bu barada Halkara Futbol federasiýasynyň (FIFA) metbugat gullugy habar berdi diýip, TASS belleýär.
Frapparyň eýýäm häzirki dünýä çempionatynda iş tejribesi bar. Öň, ol toparlaýyn tapgyryň birinji tapgyrynyň Polşa bilen Meksikanyň ýygyndylarynyň arasyndaky oýnunda (0:0) dördünji emin hökmünde çykyş etdi. Frappardan başga-da Katardaky dünýä çempionatynyň eminleriniň sanawynda iki zenan – ýaponiýaly Ýosimi Ýamasita we Ruandadan Salima Mukansanga bar.
Frappar 38 ýaşynda, ol Fransiýanyň çempionatynyň oýnuna, Milli kubogyň finalyna we Çempionlar ligasyna bellenen ilkinji zenan emin boldy we 2019-njy ýylda UEFA-nyň Super kubogy üçin Angliýanyň “Çelsi” we “Liwerpul” toparlarynyň arasyndaky oýunda baş emin wezipesini ýerine ýetirdi. Dekabr aýynda Halkara Futbol taryhy we Statistika federasiýasy (IFFHS) ony dünýä futbolynyň iň gowy zenan eminleriniň sanawynda birinji orunda goýdy.
E toparçasynda Germaniýa bilen Kosta-Rikanyň ýygyndylarynyň arasyndaky duşuşyk 1-nji dekabrda El-Haurdaky “El-Baýt” stadionynda geçiriler we Aşgabat wagty bilen 0:00-da başlar.
