Niderlandlar hem-de Senegal Katarda geçirilýän futbol boýunça dünýä çempionatynyň 1/8 final tapgyryna çykdylar.
Sişenbe güni toparlaýyn tapgyrynyň jemleýji duşuşygynda Niderlandlar Kataryň milli ýygyndysyny 2:0 hasabynda ýeňlişe sezewar etdiler. 26-njy minutda Kodi Gakpo, 49-njy minutda Frenki de Ýong gol geçirdi.
Ugurdaş duşuşykda Senegal Ekwadordan 2:1 hasabynda üstün çykdy. 44-nji minutda Ismail Sarr 11 metrlik jerime urgusyny dürs ýerine ýetirdi. 68-nji minutda bolsa, ekwadorly Moýses Kaýsedo hasaby deňledi. Emma iki minut soňra Kalidu Kulibali Senagalyň ýeňiş goluny geçirdi.
Şeýlelikde, A topardan Niderlandlar 7 utuk toplap, birinji ýerden pleý-off tapgyryna çykdy. Senegal 6 utuk bilen toparyndan 2-nji bolup çykdy.
Ekwador (4 utuk) we Katar (0) ýaryşy terk edýär.
Pleý-off duşuşyklary 3-nji dekabrda başlanýar. Fransiýa, Braziliýa we Portugaliýa eýýäm ikinji tapgyrdan soň, pleý-off tapgyryna çykmaklaryny üpjün etdiler.
