Güýmenjeler we media ulgamynda dünýäde iň iri kompaniýa bolan amerikan Walt Disney Co. kompaniýasy Bob Aýger öň 2005-2020-nji ýyllar aralygynda eýelän baş ýerine ýetiriji direktor wezipesine gaýdyp gelýär.
Aýger iki ýyllyk geldi diýip, kompaniýanyň habarynda aýdylýar.
Çözgüt maýadarlar we analitikler üçin garaşylmadyk ýagdaý boldy diýip, MarketWatch belleýär. Üstümizdäki ýylyň iýunynda Disney Aýger gidenden soň kompaniýa ýolbaşçysy bellenen Bob Çapek bilen, direktorlar geňeşi tarapyndan oňa "doly ynam bildirilýändigini" mälim edip, şertnamasyny ýene üç ýyllyk uzaltdy. Aýgeriň özi bolsa öňräk şu ýyl özüniň yzyna gaýdyp barmagy baradaky myş-myşlaryň "gülkünçdigini" nygtaýardy.
Şeýle-de, Aýger 2021-nji ýylyň aýagyna çenli Disney-iň direktorlar geňeşiniň ýerine ýetiriji başlygynyň wezipesini eýeläpdi. Onuň kompaniýa ýolbaşçylyk eden döwründe kompaniýa Pixar Animation, Marvel Entertainment we Lucasfilm kinostudiýalaryny edindi. Şonuň ýaly-da, ol 2019-njy ýylyň martynda ýapylan 21st Century Fox Inc.-iň paýnamalarynyň bir böleginiň 71 mlrd dollara satyn alynmagy boýunça geleşige ýolbaşçylyk edipdi. Şol geleşigiň arkasyndan Disney öz kontentini giňeltdi we Hulu striming hyzmatyna gözegçiligi öz üstüne aldy.
