“Red Bull” toparynyň niderlandiýaly sürüjisi Maks Werstappen 2022-möwsüminiň “Formula-1” ulag klasyndaky awtoýaryşlar boýunça dünýä çempionatynyň jemleýji tapgyry bolan Abu-Dabiniň Gran-prisinde ýeňiş gazandy. Ýaryş “Ýas Marina” awtodromynda geçirildi.
Ikinji bolup pellehana “Ferrariden” Şarl Lekler geldi. Üçlügi “Red Bulldan” meksikaly Serhio Peres jemledi. “Ferrariniň” sürüjisi çempionatyň jemi boýunça Peresden üç utuk öňe geçip, wise-çempion boldy.
Bu ýaryş “Aston Martiniň” 35 ýaşly germaniýaly sürüjisi Sebastýan Fettel üçin karýerasynda iň soňky boldy. Fettel gazanan ýeňişleriniň sany boýunça “Formula-1-iň” taryhynda üçünji orny eýeleýär (53). Ondan öňde watandaşy Mihael Şumaher (91) we britaniýaly Lýuis Hemilton (103) bar.
Hemilton “Formula-1-de” çykyş edip başlanyndan bäri ilkinji gezek möwsümi ýeňişsiz jemledi. Britaniýaly, iň bolmanda, bir ýeňişli bassyr möwsümleriň sany boýunça Şumaheriň netijesinden öňe geçip bilmedi. Iki türgeniň hasabynda-da şular ýaly 15 möwsüm bar.
Möwsümiň çempiony möhletinden ir Werstappen boldy, onuň hasabynda 454 utuk bar. Lekler 308 utuk, Peres 305 utuk gazandy. “Red Bull” Konstruktorlaryň kubogynda möhletinden ir ýeňiş gazandy, topar möwsümi 759 utuk bilen tamamlady. Ikinji orny “Ferrari” (554), üçünji orny “Mersedes” (515) eýeledi.
