«Mercedes» toparynyň sürüjisi Andrea Kimi Antonelli Maýaminiň Gran-prisiniň ýeňijisi boldy — bu onuň «Formula-1-iň» häzirki möwsüminde yzygider üçünji ýeňşidir.
Ikinji orny «McLaren» toparyndan Lando Norris eýeledi, ol ýeňijiden 3,264 sekunt yza galdy. Üçünji bolup onuň topardaşy Oskar Piastri (27,092 sekunt yzda) pellehana geldi.
Möwsümiň dört tapgyryndan soň, Antonelli sürüjileriň umumy sanawynda öňe saýlandy. Mundan ozal 19 ýaşly italýan türgeni Hytaýyň we Ýaponiýanyň Gran-prilerinde hem ýeňiş gazanypdy. Ol 1953-nji ýyldan bäri yzygider birnäçe ýeňiş gazanmagy başaran ilkinji italýan sürüjisidir.
Şol bir wagtyň özünde, geljekde «Formula-1-iň» ýene-de V8 hereketlendirijilerine dolanyp gelmeginiň mümkindigi mälim boldy. Halkara awtomobil federasiýasynyň (FIA) ýolbaşçysy Mohammed ben Sulaýemiň aýtmagyna görä, bu ýagdaý 2031-nji ýyldan gijä galman bolup biler.
Häzirki hereket edýän düzgünlere görä, 2026-njy ýyldan bäri 1,6 litrlik V6 turbo-gibrid hereketlendirijileri ulanylýar. Bu ýerde kuwwatlylyk benzin motory bilen elektrik hereketlendirijisiniň arasynda paýlanýar.
Ben Sulaýemiň aýtmagyna görä, V8 hereketlendirijileriniň gurluşy has ýönekeý, agramy ýeňil we sesi has gaty çykýar.
2030-njy ýyla çenli V8 hereketlendirijilerine geçmek üçin alty sany öndürijiniň dördüsiniň razylygy gerek. Eger bu razylyk alynmasa, federasiýa 2031-nji ýylda düzgünnamany özbaşdak üýtgedip biler.
V8 hereketlendirijileri 2006-njy ýyldan 2013-nji ýyla çenli «Formula-1-de» ulanylypdy, soňra olar has ýuwaş sesli gibrid V6 bilen çalşyryldy.
