16-njy noýabrda paýtagtymyzyň Maslahat köşgünde Milli Geňeşiň Halk Maslahatynyň Başlygy Gurbanguly Berdimuhamedowyň başlyklyk etmeginde Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň ýanyndaky Ýaşulular geňeşiniň ilkinji mejlisi boldy.
Türkmenistanyň Prezidentiniň tabşyrygy boýunça geçirilen bu duşuşykda Türkmenistanyň Maşgala kodeksi, degişli Kanunlar bilen baglanyşykly meseleler hem-de howandarlyga mätäç çagalara ýakyndan ýardam bermek boýunça öňde durýan wezipeler ara alnyp maslahatlaşyldy.
Mejlisiň barşynda ýurdumyzyň ähli welaýatlarynyň hem-de Aşgabat şäheriniň ýaşulularynyň wekilleriniň çykyşlary diňlenildi.
Gurbanguly Berdimuhamedow türkmen halkynyň taryhyň dowamynda ynsanperwerlik ýörelgelerine ygrarly bolandygyny we bu ýagşy dessurlaryň häzirki döwürde netijeli dowam etdirilýändigini belledi.
Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasy ýurdumyzyň welaýatlarynyň etraplarynyň, şäherleriniň hassahanalarynyň çagalar bölümleri üçin ähli zerur enjamlar bilen üpjün edilen häzirki zaman “Tiz kömek” awtoulaglarynyň berilmegini üpjün etdi, howandarlyga mätäç çagalara paýtagtymyzyň we welaýatlaryň lukmançylyk edaralarynda dürli operasiýalary ýerine ýetirmäge kömek etdi, bejergi üçin çykdajylary hem-de lukmançylyk enjamlaryny satyn alyp berdi.
Belläp geçsek, gaznanyň ýanyndaky Ýaşulular geňeşi 2022-nji ýylda döredildi. Haýyr-sahawat gaznasynyň we onuň ýanyndaky Ýaşulular geňeşiniň işiniň hukuk taýdan esaslandyrylmagy gaznanyň işine kuwwatly itergi berer.
