Gazagystan 2060-njy ýyla çenli uglerod bitaraplygyny gazanmak maksadyny öňde goýdy. Bu barada Gazagystanyň premýer-ministri Alihan Smailow Müsürde geçirilen Howanyň üýtgemegi baradaky global konferensiýanyň dünýä liderleriniň sammitinde eden çykyşynda aýtdy. Muny Anadolu agentligi ýetirýär.
“Şunuň çäklerinde biz ýylyň ahyryna çenli pes uglerodly ösüş strategiýasyny kabul etmegi meýilleşdirýäris. Bu taryhy pursat bolar: ilkinji gezek Merkezi Aziýadaky ýurt şeýle maksatly resminamany kabul edýär” – diýip, Smailow aýtdy.
Onuň belleýşi ýaly, häzirki wagtda Gazagystanda “ýaşyl” energiýanyň umumy önümçilikdäki paýy, takmynan, 3 göterime deň. “Şol bir wagtyň özünde onuň önümçiligini 15 göterime çenli – 2030-njy ýyla çenli 7 goşmaça GWt artdyrmak meýilleşdirilýär. Bu döwre çenli uglerod zyňyndylaryny hem azyndan 15 göterim azaltmak meýilleşdirilýär” – diýip, premýer belledi.
“Gazagystanyň “ýaşyl” energetikanyň dünýä merkezleriniň birine öwrülmegi üçin mümkinçilikleri bar. Şonuň üçin biz gaýtadan dikeldilýän energiýa çeşmelerini ösdürmegiň sebit merkezi hökmünde çykyş etmäge we umuman, Merkezi Aziýanyň “ýaşyl” tehnologiýalara geçmegine itergi bermäge taýýar” – diýip, Smailow belledi.
