2027-nji ýyla çenli Ýewropa Bileleşiginiň çäginde täze awtobuslaryň hiç biri howa we adama zyýanly bolan gazlary atmosfera goýbermeli däl. Bu maksada 11 şäherde we jemgyýetçilik guramalary tarapyndan toparlaýyn ýetmek göz öňünde tutulýar. Bu barada euronews.com habar berýär.
Pariž, Barselona, Milan ýaly şäherler bolsa Brýusseli benzin ulanýan awtobuslaryň işe girizilmegini bes etmegiň ahyrky möhletini teklip etmäge çagyrýan megapolisleriň hataryndadyr. Arassa ulag boýunça hereketleriň biriniň ýolbaşçysy eýýäm olarda has arzan boljak “ýaşyl” alternatiwalaryň bardygyny aýdýar.
“Şäher häkimiýetleri we beýleki raýat birleşikleri Ýewropa Komissiýasyna 2027-nji ýyly şäherlerdäki täze awtobuslaryň zyňyndysyz işlejek ýyly etmek teklibi bilen ýüz tutdular. Munuň özi olaryň ýa elektrik ýa-da wodorod çekişli işlejekdigini alamatlandyrýar” diýip, Jeýms Nik aýdýar. Onuň sözlerine görä, şäherlerde elektrik ulaglara isleg barha artýar. Bu bolsa şeýle awtobuslaryň önümçiligini höweslendirmek üçin hem oňat mümkinçilik. Munuň özi, öz gezeginde, bahalaryň arzanlamagyna hem täsirini ýetirer. Çünki köp şäherlerde jemgyýetçilik ulaglarynyň tölegi örän ýokary, şeýle önümçilikleriň giňeldilmegi bolsa bahalary peseltmäge ýardam eder.
