Täze agzalar — Saud Arabystany, Türkiýe, Müsür we Alžir goşulsa, BRIKS (Braziliýa, Russiýa, Hindistan, Hytaý, Günorta Afrika Respublikasy) ýurtlaryna dünýä ykdysadyýetiniň 3-den iki bölegi degişli bolar. Muňa Halkara pul gaznasynyň 2022-nji ýyl üçin maglumatlaryna salgylanyp, TASS agentliginiň çap eden hasaplamalary hem şaýatlyk edýär.
Eger bu döwletleriň satyn alyjylyk boýunça jemi içerki önümini deň hasaplasak, onda bu san 65 göterimden geçer. Şeýle-de BRIKS ýurtlaryna dünýä ilatynyň 45 göterimi, gury ýeriň bolsa 37,5 göterimi degişli bolar. Bulardan başga-da, bugdaý boýunça dünýäniň ýyllyk hasylynyň 51,4 göterimi, tüwiniň bolsa 56,1 göterimi bu ýurtlaryň paýyna düşer.
Ýeri gelende bellesek, 7-nji noýabrda “Al-Shorouk” internet portaly Alžiriň häkimiýetleriniň BRIKS toparyna agza bolmak üçin resmi ýüztutma berendigini habar berdi.
