11-nji noýabrda Özbegistanyň Samarkant şäherinde Türki Döwletleriň Guramasynyň birinji sammiti geçiriler. Munuň özi guramanyň (Türki geňeş) ady üýtgedilenden soňky geçirilýän ilkinji ýokary derejeli duşuşygy bolar. Sammite görülýän taýýarlyklar barada özbek neşirleri habarlary paýlaşýarlar.
Uzdaily.uz saýty Samarkant sammitine gurama girýän sebitleriň döwletleriniň Baştutanlarynyň gatnaşjakdygyny habar berýär. Nygtalyşy ýaly, Türki Döwletleriň Guramasynyň Samarkant sammiti agza ýurtlaryň arasyndaky köpugurly hyzmatdaşlygy täze derejä çykarar.
Habarlarda bellenilişi ýaly, duşuşygyň dowamynda döwlet Baştutanlary ykdysady, ulag we söwda meselelerini ara alyp maslahatlaşarlar. Onuň dowamynda guramanyň ýakyn 5 ýyl üçin Hereketleriniň strategik meýilnamasy kabul ediler. Sammitiň öň ýanynda — 9-njy noýabrda Türki Döwletleriň Guramasynyň agza ýurtlarynyň ykdysadyýet ministrleriniň duşuşygy bolar, 10-njy noýabrda bolsa guramanyň daşary işler ministrleriniň Geňeşiniň mejlisi geçiriler.
2009-njy ýylyň oktýabrynda döredilen Türki dilli döwletleriň hyzmatdaşlyk geňeşi (häzirki Türki Döwletleriň Guramasy) halkara hyzmatdaşlygyň netijeli syýasy meýdançalarynyň biri bolup çykyş edýär. Häzirki wagtda Azerbaýjan, Gazagystan, Gyrgyzystan, Özbegistan we Türkiýe bu düzümiň agzalary bolup durýarlar. Wengriýa bu guramada synçy derejesine eýe. Türki geňeşiň 2021-nji ýylyň 12-nji noýabrynda Stambulda geçirilen sammitinde guramanyň ady Türki Döwletleriň Guramasy diýlip üýtgedildi we onda Türkmenistana guramanyň synçysy derejesi berildi. Türkmenistanyň bu düzüme doly hukukly agza bolmagy hem göz öňünde tutulýar.
