Twitteriň täze eýesi Ilon Mask kompaniýanyň uly maliýe ýitgileri sebäpli işgärleriň bir bölegini işden çykarmakdan gaçyp bolmajakdygyny aýtdy. Bu barada TASS belleýär.
“Twitteriň işgärlerini azaltmak meselesi barada aýdylanda, gynansak-da, başga ýol ýok. Kompaniýa bir günde 4 mln dollardan gowrak ýitirýär” – diýip, telekeçi adybir sosial ulgamda ýazdy.
Ol ähli işden çykarylan işgärlere kompensasiýa hökmünde üç aýlyk kömek pulunyň teklip edilendigini hem belledi.
Belläp geçsek, Twitter satyn alnandan soň Mask derrew kompaniýanyň ýolbaşçylygynyň käbir agzalaryny işden çykardy, ol müdirler geňeşini hem işden boşatdy. Soňrak Bloomberg agentligi telekeçiniň işgärleri iki esse diýen ýaly azaltmagy meýilleşdirýändigini habar berdi.
