Xiaomi kompaniýasy aýrylýan kameraly smartfonyň konseptini çykardy. Bu barada Bloomberg agentligine salgylanyp, lenta.ru habar berýär. Täze enjam iýul aýynda hödürlenen 12S Ultra-nyň nusgawy görnüşinden Leica kompaniýasynyň gajetiň göwrümine garanyňda ägirt uly aýrylýan obýektiwiniň bardygy bilen tapawutlanýar. Žurnalistleriň aýtmagyna görä, bu enjam smartfon bilen fotoapparatyň gibrididir.
Kompaniýa 12S Ultra-nyň konseptual görnüşiniň 10 bit we RAW formatda surata düşürmäge mümkinçilik berýändigini belledi. Fotografiýanyň işlenilmegine Al Image Solution tehnologiýasy jogap berýär. Leica Hytaýyň korporasiýasynyň hyzmatdaşydyr.
Žurnalistler kompaniýanyň smartfon bazaryndaky global çökgünligiň esasynda konseptual gurluşlary çykarmak bilen ünsi özüne çekýändigini belleýärler. “Kompaniýa berk bäsdeşlik we watanynda kyn sarp ediji perspektiwalary, şeýle-de Hindistanyň bazarynda mümkin bolan satuw çäklendirmeleri bilen ýüzbe-ýüz boldy” – diýip, awtorlar belleýär.
Aýrylýan kameraly şuňa meňzeş smartfon 2014-nji ýylda Panasonic we Leica tarapyndan hödürlenildi, ýöne enjam satuwda şowsuzlyga uçrady. Xiaomi kompaniýasy 12S Ultra-nyň konsept görnüşiniň bazara çykaryljakdygyny ýa-da ýokdugyny bolsa aýdyňlaşdyrmady.
