Xiaomi kompaniýasy Hytaýda bahasy 849 ýuan (takmynan, $124) bolan ilkinji açyk görnüşli klipsa gulaklyklaryny hödürledi. Satuwyň ilkinji günlerinde bu gurluşy arzanladylan bahadan — 799 ýuana (takmynan, $117) satyn almak bolýar.
Täze model adaty gulaklyklar ýaly gulagyň içine salynman, ýörite gysgyç arkaly gulak gabygyna dakylýar. Bu gurluş adaty silikon uçly gulaklyklary ulanmagy halamaýan adamlar, şeýle hem iş wagtynda ýa-da ýolda barýarka daş-töweregindäki sesleri hem eşitmek isleýän ulanyjylar üçin niýetlenendir.
Gulaklygyň hersiniň agramy 5,5 grama barabar. Ony gulakda berkitmek üçin formasyny ýitirmeýän titan sim ulanyldy. Gurluşyň içinde ýokary derejeli audio sesleri geçirmek üçin LHDC 5.0 protokolyny goldaýan 11 millimetrlik dinamiki şöhlelendirijiler ýerleşdirildi.
Sesleriň daşary ýaýramagyny azaltmak üçin Xiaomi kompaniýasy ses tolkunlaryny gönükdirip geçirmek we ters öwürmek tehnologiýasyny ulanýar. Gulaklyk arkaly gürleşilende bolsa, daşarky goh-galmagallary basyp, sesiň arassa gitmegini üpjün etmek üçin üç sany adaty mikrofon we süňk arkaly sesi geçiriji mikrofon ulgamy işleýär.
Gulaklyklar IP57 standarty boýunça suwdan we tozandan goraglydyr. Onuň zarýady 9 sagada çenli, ýörite zarýad gutusy bilen bilelikde ulanylanda bolsa 38 sagada çenli ýetýär.
Bu model HyperOS operasion ulgamy bilen doly utgaşykly işleýär we birnäçe emeli aň funksiýalaryny goldaýar. Olaryň hatarynda XiaoAI ses kömekçisiniň üsti bilen amala aşyrylýan 21 dile hakyky wagtda göni terjime etmek, gepleşigi tekst görnüşine geçirmek we gysgaça mazmunyny taýýarlamak bar.
