Tehniki başarnyklaryň ýetmezçiligi, maglumatlaryň gizlinligi babatdaky gorkular we hukuk taýdan näbellilikler ýewropa kompaniýalarynyň emeli aň (EA) gurallaryny ulanmakdan ýüz döndermeginiň esasy sebäpleri bolup galýar. Munuň şeýledigini «Eurostat-yň» hasabatyndaky maglumatlardan hem bilmek mümkin.
Bu ýagdaý Ýewropa Bileleşiginde emeli aňy önümçilige girizmegi höweslendirmek we bu ugurdaky düzgünleri ýenilleşdirmek baradaky maslahatlaryň geçirilýän wagtynda ýüze çykaryldy.
Işgärleriniň sany 50-den 249-a çenli bolan orta telekeçiligiň 10,51%-i bu sebäbi tehniki ukyplaryň ýetmezçiligi bilen bagladylar. Bu görkeziji işgär sany 250-den geçýän iri kompaniýalarda 10,32%-e ýetdi.
Orta kompaniýalaryň 7,95%-i, iri kärhanalaryň bolsa 9,31%-i maglumatlaryň gizlinligini goramak üçin emeli aňy ulanmakdan ýaýdanýar.
Orta telekeçiligiň 7,51%-i hem-de iri kärhanalaryň 8,12%-i emeli aňy ulanmagyň geljekki kanuny netijeleriniň düşnüksizdigini mälim etdi.
Şeýle-de orta derejeli biznesiň 5,67%-i, iri kompaniýalaryň bolsa 5,51%-i bolsa bu usulyň ýokary harajatlary zerarly gymmat düşýändigini esasy sebäp edindiler.
Mundan başga-da kompaniýalar emeli aň programmalarynyň özleriniň bar bolan köne ulgamlaryna gabat gelmeýändigini we zerur bolan maglumatlar gorunyň ýeterlik däldigini bellediler.
Emma muňa garamazdan, kärhanalaryň agramly bölegi emeli aňyň geljegine we güýjüne ynanýar. Orta telekeçiligiň diňe 2,09%-i we iri kärhanalaryň bary-ýogy 1,55%-i emeli aňy öz biznesine peýdasyz hasaplaýar.
Barlagyň netijelerine görä, işgärleriň tehniki taýdan başarnyksyzlygy we tejribesizligi baradaky iň uly aladalar we görkezijiler Daniýada, Germaniýada we Finlýandiýada hasaba alyndy.
