2-nji noýabrda Milli Geňeşiň Halk Maslahatynyň Başlygy Gurbanguly Berdimuhamedow Russiýa Federasiýasyna resmi saparynyň çäklerinde RF-niň Federal Ýygnagynyň Federasiýa Geňeşiniň umumy mejlisinde maksatnamalaýyn çykyş etdi.
Ir bilen Milli Geňeşiň Halk Maslahatynyň Başlygynyň awtomobil kerweni Russiýa Federasiýasynyň Federal Ýygnagynyň Federasiýa Geňeşiniň binasyna bardy. Merkezi girelgäniň öňünde Gurbanguly Berdimuhamedowy Federasiýa Geňeşiniň Başlygynyň orunbasary Konstantin Kosaçýew we RF-niň Federal Ýygnagynyň Federasiýa Geňeşiniň Diwanynyň ýolbaşçysynyň orunbasary – Halkara gatnaşyklar müdirliginiň başlygy Nikolaý Paruzin garşylady.
Russiýa Federasiýasynyň Federal Ýygnagynyň Federasiýa Geňeşiniň Başlygy Walentina Matwiýenko umumy mejlisi açyp, Türkmenistanyň Milli Geňeşiniň Halk Maslahatynyň Başlygy Gurbanguly Berdimuhamedowa söz berdi.
Çykyşynyň dowamynda Milli Geňeşiň Halk Maslahatynyň Başlygy parlament diplomatiýasynyň halkara giňişliginde parahatçylygy, ynanyşmagy we açyklygy pugtalandyrmak işine uly goşant goşmaga, dünýäniň syýasy gün tertibine oňyn itergi bermäge, halkara ykrar edilen hukuk kadalarynyň, Birleşen Milletler Guramasynyň Tertipnamasynyň düzgünleriniň, esasy halkara ylalaşyklarynyň we konwensiýalarynyň ýoýulmagyna ýol bermezlige gönükdirilendigine ynam bildirdi.
Şunuň bilen baglylykda, dürli ýurtlaryň kanunçykaryjy edaralarynyň arasyndaky hyzmatdaşlygyň, dünýäde döredilen parlament birleşikleriniň, ilkinji nobatda bolsa, olaryň iň irisiniň we abraýlysynyň—Parlamentara birleşiginiň orny ýokarlanýar diýip, Gurbanguly Berdimuhamedow aýtdy.
— Populizm, gysga wagtlyk syýasy bähbitlere kowalaşmaklyk, köre-körlük bilen eýermeklik hiç haçan uzakmöhletleýin geljekde ne döwlete ne-de jemgyýete peýda getirmändi diýip Gurbanguly Berdimuhamedow aýtdy we şunuň bilen birlikde, elbetde, biz halkara parlamentariziminiň hem-de kanunçykaryjylygynyň hakykatdan-da peýdaly tejribelerinden ýüz öwürmeli däldiris, olardan durmuş tarapyndan tassyklanan iň oňadyny almalydyrys diýip belledi.
Çykyşynyň ahyrynda Gurbanguly Berdimuhamedow RF-niň Federal Ýygnagynyň ýokarky palatasynyň ähli agzalaryna bu döredijilikli işe işjeň gatnaşandyklary we saldamly goşantlary üçin minnetdarlyk bildirdi.
Türkmenistanyň Milli Geňeşiniň Halk Maslahatynyň Başlygynyň çykyşy uly üns bilen diňlenildi.
