2-nji noýabrda Prezident Serdar Berdimuhamedowyň ýolbaşçylygynda geçirilen Türkmenistanyň Döwlet howpsuzlyk geňeşiniň nobatdaky mejlisinde 2022-nji ýylyň on aýynda harby we hukuk goraýjy edaralaryň alyp baran işleriniň netijelerine garaldy.
Mejlisiň dowamynda Döwlet howpsuzlyk geňeşiniň agzalalary çykyş edip, ýanwar-oktýabr aýlarynda geçirilen işler barada hasabat berdiler.
Serdar Berdimuhamedow hasabatlary diňläp, degişli ýolbaşçylara anyk tabşyryklary berdi.
Hususan-da, Serdar Berdimuhamedow hukugy goramagyň hem-de kanunylygy üpjün etmegiň möhüm döwlet edarasy hökmünde prokuraturanyň eýeleýän ornuny belläp, bu edaranyň işgärleriniň üstlerine ýüklenilen wezipeleri ýerine ýetirmäge jogapkärli çemeleşmelidiklerini, giň dünýä garaýşa we öňdebaryjy tehnologiýalar bilen işlemek başarnygyna eýe bolmalydyklaryny nygtady.
Işlemegiň häzirki zaman guramaçylyk görnüşlerini, IIM-niň hemme düzüm bölümlerinde sanly ulgamy ulanmak, şeýle hem işgärleriň hünär derejesini yzygiderli ýokarlandyrmak öňde durýan işleriň möhüm ugurlarynyň hatarynda çykyş edýär diýip, döwlet Baştutany içeri işler ministrine degişli görkezmeleri berdi.
Öňde durýan wezipeleri üstünlikli çözmek üçin täzeçil tehnologiýalary ulanmak arkaly kazyýet edaralarynyň işgärleriniň hünär başarnyklaryny kämilleşdirmek boýunça okuw maslahatlaryny guramak zerur diýip, ýurdumyzyň Serdar Berdimuhamedow edaranyň ýolbaşçysyna degişli tabşyryklary berdi.
MHM-niň alyp barýan işleriniň ileri tutulýan ugry ýurda häzirki zamanyň ählumumy howplarynyň aralaşmagyna ýol bermezlikden ybaratdyr diýip, Serdar Berdimuhamedow bu düzümiň ýolbaşçysyna ýurdumyzda howpsuzlygy, jemgyýetde abadançylygy we hukuk tertibini üpjün etmek maksady bilen beýleki hukuk goraýjy edaralar bilen ýakyn gatnaşyk saklamagy tabşyrdy.
Döwlet Baştutany Döwlet serhet gullugynyň başlygyna şahsy düzümiň söweşjeň, beden, hünär taýýarlyk derejesini ýokarlandyrmagy hemişe gözegçilikde saklamagy tabşyrdy.
Kabul edilýän kadalaşdyryjy resminamalar barada ilat arasynda düşündiriş häsiýetli çäreleri talabalaýyk derejede geçirmeli diýip, Serdar Berdimuhamedow adalat ministrine anyk görkezmeleri berdi.
