Xiaomi kompaniýasy rekord zarýad alyş wagtyna eýe bolan smartfony çykardy. Bu barada “The Verge” neşiri ýazýar. Kompaniýa Redmi Note 12 tapgyrynyň smartfonlaryny anons etdi, onuň flagman gurluşy bolsa Redmi Note 12 Discovery Edition boldy. Gajetiň tapawutly aýratynlygy kuwwaty 210 watt bolan HyperCharge çalt zarýad beriş tehnologiýasyny götermegidir. Kompaniýa 4300 milliamper/sagat sygymly telefon akkumulýatoryna dokuz minutda 100 göterime çenli zarýad berip boljakdygyny wada berýär diýip, lenta.ru belleýär.
Şeýle-de, gurluş 120 Gs ýygylykly 6,67 dýuýmlyk OLED displeýine, MediaTek Dimensity 1080 prosessoryna, 8 Gb operatiw we 128 Gb içerki ýada, 200, 8 we 2 Mp durulykly üç kamera eýe boldy. Redmi Note 12 Discovery Edition 2399 ýuan bilen bahalandyryldy.
Žurnalistleriň habar bermegine görä, Hytaý kompaniýalary soňky döwürde, esasan, smartfonlaryň zarýad alyş tizligine üns berýärler. Mysal üçin, 2021-nji ýylda Xiaomi 120 watt kuwwatly zarýad berijini göterýän 11T Pro telefonyny çykardy, soňrak Oppo 150 watt kuwwatly SuperVOOC standartyny anons etdi.
