30-njy oktýabrda Halkara «Türkmen alabaý itleri» assosiasiýasynyň toplumynda «Ýylyň türkmen edermen alabaýy» atly halkara bäsleşigiň jemleýji tapgyry geçirildi.
Türkmen alabaýlaryny köpeltmek, olaryň arassa ganlylygyny gorap saklamak, dünýäde wagyz etmek bilen baglanyşykly işleri ylmy esasda kämilleşdirilmegine, milletiň baý medeni mirasyna aýrylmaz bölegine öwrülen itleriň bu tohumyna dünýä jemgyýetçiliginiň ünsüni çekmäge gönükdirilen bu bäsleşik iki tapgyrda geçirildi. Bäsleşige gatnaşyjylaryň 20-sinden jemleýji tapgyra 10-sy gatnaşmaga hukuk gazandy.
Alabaýlar yzly-yzyna syn ediş meýdançasyna çykaryldy. Eminler we tomaşaçylar üçin itleriň ady, ýaşy, nesil ugry, olaryň eýeleri baradaky maglumatlar aýdyldy.
Bäsleşigiň jemleýji tapgyrynda alabaýlaryň öňünde anyk wezipeler, şol sanda päsgelçilikli zolaklary ýeňip geçmek wezipeleri goýuldy. Päsgelçiliklerden geçilende, tizlik we dürslük görkezijileri hasaba alyndy.
Bäsleşigiň netijeleri boýunça eminler toparynyň çözgüdi yglan edildi. Şeýlelikde, «Ýylyň türkmen edermen alabaýy» adyna Içeri işler ministrligine degişli Goňurhan atly alabaý mynasyp boldy. Goňurhan atly alabaýy ösdürip ýetişdiren hem-de bu bäsleşige taýýarlan Ý.Töräýew.
Goňurhana «Ýylyň türkmen edermen alabaýy» medaly berildi. Onuň idegçisi G.Aşyrowa bolsa Türkmenistanyň Prezidentiniň baş baýragy — «Toyota Camry» kysymly awtoulagyň açary, şeýle hem göçme kubok, diplom gowşuryldy.
