29-njy oktýabrda Aşgabatda Halkara «Türkmen alabaý itleri» assosiasiýasynyň II mejlisi geçirildi.
Foruma ugurdaş düzümleriň, ýokary okuw mekdepleriniň ýolbaşçylary we hünärmenleri Assosiasiýanyň agzalary hem-de sanly ulgam arkaly daşary ýurtly itşynaslar hem gatnaşdylar.
Mejlisi wise-premýer, Halkara «Türkmen alabaý itleri» assosiasiýasynyň wise-prezidenti A.Ýazmyradow açdy.
Mejlisiň dowamynda onuň gün tertibine laýyklykda, halkara assosiasiýanyň işine dahylly guramaçylyk meselelerine garaldy hem-de öňde durýan wezipeler ara alnyp maslahatlaşyldy. Mundan başga-da, assosiasiýanyň düzümine täze agzalar kabul edildi, ýurdumyzyň has tapawutlanan itşynaslaryna döwlet sylaglary gowşuryldy.
Dabaranyň çäklerinde alabaýyň keşbi beýan edilýän şekillendiriş we amaly haşam sungaty eserleriniň, çaphana önümleriniň, fotosuratlaryň, haly önümleriniň we heýkelleriň sergisi guraldy.
