Gazagystan Garaşsyz Döwletleriň Arkalaşygynda başlyklygy resmi taýdan Gyrgyzystana geçirdi. Premýer-ministr Alihan Smailow Astanadaky GDA döwletleriniň hökümet baştutanlarynyň geňeşiniň mejlisinde 2022-nji ýylda Garaşsyz Döwletleriň Arkalaşygynda Gazagystanyň başlyklygynyň meýilleşdirilen ähli işleriniň doly ýerine ýetirilendigini aýtdy. Bu barada centralasia.media habar berýär.
“Şu ýyl Gazagystan Garaşsyz Döwletleriň Arkalaşygynda başlyklyk edýär. Biziň başlyklygymyzy durmuşa geçirmegiň çäklerinde ähli ugurlarda özara gatnaşyklary çuňlaşdyrmak boýunça amaly işler alnyp baryldy. Mälim bolşy ýaly, Astana sammitinde Arkalaşykda başlyklyk estafetasy Gyrgyzystan Respublikasyna geçirilýär. Şunuň bilen baglylykda, gyrgyz dostlarymyzy bu möhüm we abraýly wezipe bilen gutlamak isleýärin” – diýip, Gazagystan hökümetiniň baştutany aýtdy.
GDA döwletleriniň hökümet baştutanlarynyň geňeşiniň indiki mejlisi 2023-nji ýylyň 2-nji iýunynda Bişkekde geçiriler.
Astanada GDA-nyň hökümet baştutanlarynyň geňeşiniň mejlisi geçirildi. Duşuşyga Gazagystanyň premýeri Alihan Smailow, Azerbaýjanyň premýeri Ali Asadow, Belarusyň premýeri Roman Golowçenko, Täjigistanyň premýeri Kohir Rasulzoda, Özbegistanyň premýeri Abdulla Aripow, Russiýanyň premýeri Mihail Mişustin, Gyrgyzystanyň premýeri Akylbek Žaparow, Ermenistanyň wise-premýeri Mger Grigorýan, Türkmenistanyň Ministrler kabinetiniň başlygynyň orunbasary Hojamyrat Geldimyradow we GDA-nyň ýerine ýetiriji komitetiniň başlygy Sergeý Lebedew gatnaşdy.
