Dünýäniň iň uly awiasiýa, kosmos we harby tehnikasyny öndürijileriniň biri bolan amerikan konserni Boeing Co. komponentleriň üpjünçiligi bilen bagly mesele sebäpli şu ýyl üçin Boeing 737 uçarlarynyň önümçiligi baradaky çaklamasyny ýene-de azaltdy. Bu barada Interfax.ru habar berýär.
Awiaöndüriji 2022-nji ýylda bazara bu modelden 375 uçar ibermegi göz öňünde tutýar diýip, kompaniýanyň maliýe müdiri Braýan West üçünji çärýek üçin maliýe hasabaty neşir edilenden soň geçirilen metbugat konferensiýasynda aýtdy. Ilkibaşda kompaniýa şu ýyl bu modeliň önümçiliginiň 500 uçara deň boljakdygyny çaklapdy, ýöne iýul aýynda çaklamany “takmynan, 400 uçara” çenli azaltdy.
Şol bir wagtyň özünde, Boeing indiki ýyl aýda ortaça 30 uçar öndürip bilmegine we şu ýylyň ahyryna çenli önümçilik görkezijileriniň ep-esli ýokarlanmagyna garaşýar.
