Indoneziýanyň häkimiýetleri barly daşary ýurtlular, maýadarlar we ýokary hünärli işgärler üçin uzak möhletli wizalary bermegiň täze düzgünlerini tamamlamagyň üstünde işleýär. Bu barada Indoneziýanyň detikNews täzelikler portaly habar berýär diýip, TASS belleýär.
Indoneziýanyň immigrasiýa gullugynyň baş müdiri Widodo Ekatýahýana gürrüňiň 10 ýyla çenli uzaldylyp bilinjek bäş ýyllyk täze ýörite wizalar baradadygyny aýdýar. Ýagny, bu ikinji öý wizalarydyr. Häkimiýetler bu ýol bilen, ilkinji nobatda, maýadarlary, uly kapitaly bolan adamlary ýurda çekmek isleýärler. Mundan başga-da, şeýle wizalary haýsydyr bir ugurdan ýokary hünäre eýe bolan adamlar, daşary ýurtlardaky Indoneziýa diasporasynyň wekilleri alyp biler.
“Ikinji öý wizasy” boýunça alnyp barylýan işler entek tamamlaýyş tapgyrynda. Tiz wagtdan, ähtimal, geljekki hepdeleriň dowamynda bu maksatnama kanuny taýdan resmileşdirilip, durmuşa geçirilip başlanar diýip umyt edýärin” – diýip, Ekatýahýana aýtdy. Şeýle wizany almagyň anyk şertleri barada heniz maglumat ýok.
“South China Morning Post” gazetiniň habar bermegine görä, şu ýyl Indoneziýa $76,7 mlrd daşary ýurt maýa goýumyny almagy maksat edinýär. Geçen ýyl bu görkeziji $57,6 mlrd boldy. “Ikinji öý wizasyny” girizmek bilen Indoneziýa eýýäm daşary ýurtly maýadarlara aýratyn wiza şertlerini, şol sanda ýurtda birnäçe ýyl ýaşandan soň raýatlyk almaga hukuk berýän şertleri hödürleýän ýurtlaryň hataryna goşular.
