Türkmenistanyň Milli Geňeşiniň Halk Maslahatynyň Başlygy Gurbanguly Berdimuhamedow ýakynda Koreýa Respublikasynda saparda bolar. Bu barada 24-nji oktýabrda Seulda wise-premýer, daşary işler ministri Raşid Meredowyň Koreýa Respublikasynyň Milli Assambleýasynyň Başlygy Kim Çžin Phýo bilen geçirilen duşuşygynda aýdyldy. Bu maglumaty TDIM-niň Metbugat gullugy ýaýradýar.
Nygtalyşy ýaly, duşuşygyň başynda Türkmenistanyň daşary syýasat edarasynyň ýolbaşçysy Prezident Serdar Berdimuhamedowyň we Milli Geňeşiň Halk Maslahatynyň Başlygy Gurbanguly Berdimuhamedowyň adyndan Koreýa Respublikasynyň Milli Assambleýasynyň Başlygyna gyzgyn salamlaryny ýetirdi. Gepleşikleriň dowamynda ministr Gurbanguly Berdimuhamedowyň Koreýa Respublikasynyň Milli Assambleýasynyň Başlygynyň adyna ýollan hatyny gowşurdy.
Milli Assambleýanyň Başlygy jogap hatyna çuňňur minnetdarlygyny bildirip, türkmen-koreý gatnaşyklarynyň köp ugurlar boýunça ösdürilmeginde Gurbanguly Berdimuhamedowyň uly goşandynyň bardygyny aýratyn belledi. Ol şeýle-de Gurbanguly Berdimuhamedowyň ýakyn wagtda Koreýa Respublikasyna resmi sapar bilen gelmegine sabyrsyzlyk bilen garaşýandygyny nygtap, saparyň iki ýurduň arasyndaky däp bolan dostlukly gatnaşyklaryň mundan beýläk-de ösdürilmegi üçin möhüm tapgyr boljakdygyna ynam bildirdi.
Ýeri gelende bellesek, 23-25-nji oktýabrda Türkmenistanyň Ministrler Kabinetiniň Başlygynyň orunbasary, daşary işler ministri Raşid Meredow “Merkezi Aziýa — Koreýa Respublikasy” hyzmatdaşlyk forumynyň 15-nji mejlisine gatnaşmak üçin Koreýa Respublikasynda iş saparynda bolýar.
