Ýewropa Bileleşigi Merkezi Aziýa boýunça Strategiýasynyň çäklerinde Türkmenistanyň “Ýewropa Bileleşigi — Merkezi Aziýa” görnüşindäki hyzmatdaşlyga taýýardygyna ýokary baha berýär hem-de bu görnüşde netijeli pikir alyşmalara garaşýar. Bu barada Türkmenistanyň Garaşsyzlyk güni mynasybetli Prezident Serdar Berdimuhamedowyň adyna iberen gutlag hatynda Ýewropa Geňeşiniň Başlygy Şarl Mişel ýazýar.
Hususan-da, hatda: "Ýewropa Bileleşigi uzak möhletleýin hyzmatdaş hökmünde syýasy gepleşikler, ikitaraplaýyn we köptaraplaýyn taslamalar arkaly Siziň ýurduňyz bilen hyzmatdaşlygy dowam etdirmäge ygrarlydyr. Noýabr aýynda Aşgabatda geçiriljek “ýaşyl” energetika hem-de metanyň zyňyndylaryny azaltmak boýunça bilelikdäki maslahat Ýewropa Bileleşiginiň Türkmenistan bilen ýakyn hyzmatdaşlyga ygrarlydygynyň subutnamasy bolar. Biziň dialogymyzyň, şol sanda adam hukuklary boýunça gatnaşyklarymyzyň we hyzmatdaşlygymyzyň Türkmenistanyň mundan beýläkki ösüşine, ýurduňyzyň ähli raýatlarynyň ykdysady, durmuş mümkinçilikleriniň ýokarlanmagyna ýardam berjekdigine tüýs ýürekden umyt edýärin" diýlip bellenilýär.
