Tailandyň Pattaýýa şäheriniň golaýynda Sony Pictures kompaniýasynyň filmleriniň esasynda döredilen dünýäde ilkinji tematiki güýmenjeler akwaparky Columbia Pictures Aquaverse açyldy. Onuň açylyş dabarasy sişenbe güni boldy. Bu barada TASS habar berýär.
Amazon Falls seýilgähiniň operator kompaniýasynyň ýolbaşçysy Liakat Dhançi akwaparkyň gurluşygynyň uzak wagtlap, şol sanda koronawirus pandemiýasy döwründe-de dowam edendigini aýtdy. Ilkibaşda Aquaverse 2021-nji ýylyň oktýabr aýynda bölekleýin işläp başlar diýlip çak edilipdi.
Seýilgähde “Jumanji”, “Arwahlary awlaýjylar”, “Zombilende hoş geldiňiz” ýaly filmleriň, şeýle-de “Nägehanlar dynç alyşda”, “Bulutly, frikadelle görnüşinde ygalyň ýagmagy mümkin”, “Emoji film” ýaly multiplikasion lentalaryň esasynda döredilen attraksionlar hödürlenýär. Aquaverse dürli suw we ýerüsti attraksionlary öz içine alýan birnäçe tematiki zolaklara bölünýär. Beýlekiler bilen bir hatarda, seýilgähiň çäginde kinolentalardan rekwizitler bilen söwda nokatlary hem-de tematiki restoranlar bar.
Akwaparky döredijiler onuň diňe bir ýerli ýaşaýjylary däl, eýsem daşary ýurtly syýahatçylary hem özüne çekjekdigine umyt bildirýärler. 12-nji oktýabrda Aquaverse ähli isleg bildirýänler üçin açylýar.
