Türkiýäniň parlamenti Katardaky “Dünýä çempionatynyň galkany” operasiýasynyň çäklerinde ýurduň harby kontingentiniň alty aýlyk missiýasy baradaky kanun taslamasyny tassyklady. Ol Türkiýäniň harby gullukçylarynyň 20-nji noýabrdan 18-nji dekabr aralygynda Katarda geçiriljek 2022-nji ýylyň futbol boýunça dünýä çempionatynyň howpsuzlygyny üpjün etmek boýunça işlere gatnaşmagyny göz öňünde tutýar diýip, TRT teleýaýlymy habar berýär. Muny TASS ýetirýär.
Missiýa Kataryň häkimiýetleriniň Türkiýä ýüz tutmagy esasynda ýerine ýetiriler. “Türkiýe bilen Kataryň arasyndaky taryhy, medeni we ynsanperwer gatnaşyklary, iki ýurduň syýasy, ykdysady, harby we beýleki ugurlardaky ýakyn hyzmatdaşlygyny, şeýle-de Pars aýlagynyň sebitiniň durnuklylygynyň we howpsuzlygynyň tutuş sebit üçin möhümligini göz öňünde tutup, Kataryň hökümetiniň haýyşyna oňyn jogap bermek maksadalaýyk hasaplandy” – diýlip, parlamentiň çözgüdinde aýdylýar.
Öň, Türkiýäniň Katara sport obýektleriniň we myhmanhanalaryň howpsuzlygyny üpjün etmekde kömek bermek üçin 3 müň töweregi polisiýa işgärini, 100 sany ýörite güýçleriň işgärini, partlaýjy maddalar boýunça 50 hünärmeni we 80 sany gulluk itini iberjekdigi habar berildi.
