Speedtest serwisiniň eýesi Ookla kompaniýasy Starlink hemra üpjün edijisiniň dünýäniň dürli sebitlerinde üpjün edýän birikme tizligi boýunça hasabatyny neşir etdi. II çärýekdäki hasabata Ýewropada, Okeaniýada, Demirgazyk we Günorta Amerikalarda geçirilen ölçegleriň netijeleri girdi. Bu barada 3dnews.ru habar berýär.
Şeýle-de, gözlegçiler Kanadada, Fransiýada, Germaniýada, Täze Zelandiýada, Beýik Britaniýada we ABŞ-da görkezijileriň ýyllyk dinamikasyny deňeşdirdiler: şu ýylyň II çärýeginde tizlik geçen ýylyň degişli döwri bilen deňeşdirilende ähli ýerde pese gaçdy, pese gaçyş 9-dan 54%-e çenli boldy. Ookla muny abonent bazasynyň ösüşi bilen baglanyşdyrýar. Demirgazyk Amerikada ortaça ýükleýiş tizligi 60 Mbit/s-dan ýokary boldy. Puerto-Rikoda Starlink-iň netijeleri (112,22 Mbit/s) Demirgazyk Amerikanyň ähli hemra üpjün edijileri üçin rekordly boldy.
II çärýekde Ýewropa ýurtlarynyň 16-synda Starlink-iň tizligi ýerli üpjün edijileriň ortaça görkezijisinden ýokary boldy, Ýewropanyň 10 ýurdunda Starlink-iň ýükleýiş tizligi 100 Mbit/s-dan ýokarydy. Gresiýada we Awstriýada gidýän Starlink kanaly degişlilikde 19,34 we 17,14 Mbit/s görkezip, simli operatorlaryň gidýän tizliginden öňe geçdi. Starlink-iň iň az gijikdirmesi Ispaniýada we Beýik Britaniýada göründi: degişlilikde, 37 ms we 39 ms.
Ilon Maskyň kompaniýasy Braziliýada iň çalt hemra üpjün edijisi boldy (128,38 Mbit/s), Starlink Çilide ikinji orny eýeledi (94,79 Mbit/s). Bu ýurtlarda hyzmat iň az gijikdirmäni görkezdi – 38 ms. Täze Zelandiýada Starlink Okeaniýadaky iň çalt hemra üpjün edijisi boldy, bu ýerde ortaça ýükleýiş tizligi 105,99 Mbit/s ýetdi. Tongada hemra operatory 45,25 Mbit/s netijäni görkezdi. Gijikdirme Awstraliýada 49 ms, Täze Zelandiýada 78 ms, Tongada 98 ms boldy.
Gözlegçiler geljek ýyl tizligiň hasam peseljekdigini çaklaýarlar we munuň sebäpleriniň biri hökmünde Ookla hemra aragatnaşygynyň mobil bazaryna ýaýramagyny hasaplaýar – abonentleriň sany we birikme tizligi ters proporsional.
