Amerikanyň Starbucks Corp. kofehanalar tory 2025-nji ýyla çenli Hytaýda 3 müň sany täze kofehana açmagy we şol döwür içinde ýurtda söwdasyny iki esse artdyrmagy meýilleşdirýär diýip, Sietlde geçen "Maýadaryň gününde" kompaniýanyň top-menejerleri habar berdi.
Şonda ýene üç ýyldan Starbucks-yň Hytaýdaky torunda 9 müň kofehana bolar.
Owal kompaniýa 2022-nji ýylyň ahyryna çenli ýurtdaky kofehanalaryň sanynyň 6 müňe ýetjekdigini habar beripdi diýip, The Wall Street Journal belleýär.
Ýylyň başynyň kompaniýa üçin gaty çylşyrymly başlanandygyna garamazdan, optimistik meýilnama beýan edilipdi. Starbucks-yň Hytaýda ýylyň 3-nji iýulda tamamlanýan maliýe çärýeginiň içinde deňeşdirilýän satuwlar ýyllyk aňlatmada 44% pese gaçdy, emma şol döwür içinde umumy dünýä görkezijisi welin, 3% ösüpdi. Şondan öňki çärýekde koronawirus pandemiýasyny saklamak bilen bagly berk çäreler sebäpli hytaý kofehanalaryndaky söwda 23% peselipdi.
Emma Starbucks-yň ýolbaşçylygy pese gaçyşlyk wagtlaýyn zat, hytaý bazarynyň potensialy bolsa juda ýokary bolmagynda galýar diýip hasaplaýar. Kompaniýa 2021-nji maliýe ýylynda ähli düşewündiniň 13%-ni Hytaýda gazandy.
"Kofe ýaş hytaýlylaryň gowy görýän içgisine öwrülip barýar, we biz bazaryň möhüm bölegini eýelemäge taýýar - diýip, kompaniýanyň ýolbaşçysynyň wezipesini wagtlaýyn ýerine ýetiriji Goward Şuls aýdýar. - Häzir biz ýurtda uzak möhletleýin ösüş üçin maýa goýýarys."
Onuň sözlerine görä, häzir Hytaýyň ilaty bir ýylda ortaça 10-12 çaşka kofe içýär, ABŞ-da tersine - 380. 2014-nji ýylda bolsa Hytaýda kofeniň sarp edilişi bir ýylda üç çaşka-da ýetenokdy.
2022-nji ýylyň başyndan bäri Starbucks-yň kapitalizasiýasy 25% diýen ýaly pese gaçdy we häzir 102,2 mlrd töweregidir.
