Finlýandiýa ýylyň birinji ýarymynda önümçilikde ýa-da jaýlary ýylatmakda bökdençlige ýol bermezden tebigy gazyň sarp edilişini iki esse azaltdy diýip, ýurduň iň uly gazeti bolan “Helsingin sanomat” habar berýär. Muny RIA Nowosti ýetirýär.
“Ýanwar aýyndan awgust aýy aralygynda Finlýandiýa, takmynan, 8,8 terawatt/sagat tebigy gaz sarp etdi, bu bolsa geçen ýylyň degişli döwri – 17,8 terawatt/sagat bilen deňeşdirilende, takmynan, iki esse azdyr. Sarp edişiň tas 50% azalmagy Ýewropanyň rekordydyr” – diýlip, habarda aýdylýar.
Brugel analitiki merkez tarapyndan toplanan maglumatlara esaslansak, ÝB-niň başga hiç bir döwletine gazyň sarp edilişini şeýle derejede azaltmak başartmady diýip, neşir belleýär. Şu ýylyň birinji ýarymynda ÝB-de gazyň sarp edilişi ýyllyk hasabynda bary-ýogy 6% azaldy, käbir ýurtlarda bolsa birneme ösüş hasaba alyndy. ÝB-niň maksady gazyň sarp edilişini 15% azaltmakdan ybarat.
Pudak hünärmenleriniň pikiriçe, Finlýandiýanyň rekordynyň sebäpleriniň biri aýratyn gaz ýyladyjylary bolan öýleriň sanynyň az bolmagy, şeýle-de ýylylyk energiýasyny öndürijiler tarapyndan tebigy gazyň kömür, biomassa ýa-da torf ýaly ýangyjyň beýleki görnüşleri bilen çalşylmagy bilen baglanyşyklydyr.
