Türkmenistanyň Mary welaýatynda ägirt uly «Galkynyş» gaz känini özleşdirmegiň täze tapgyry başlandy. Şu gün irden geçirilen dabaraly çäre barada «Neýtralnyý Turkmenistan» gazetiniň elektron neşiri habar berýär.
Mundan ozal, Türkmenistanyň Prezidenti Serdar Berdimuhamedowyň Kararyna laýyklykda, «Türkmengaz» döwlet konserni Hytaýyň «CNPC Amudarya Petroleum Company Ltd.» kompaniýasy bilen ýylda 10 milliard kub metr harytlyk gazy taýýarlaýan desgany we şol möçberde harytlyk gazy taýýarlamak üçin ýeterlik boljak ulanyş guýularyny taslamalaşdyrmak hem-de doly taýýar edip gurmak barada ylalaşyk baglaşypdy.
Täze tapgyryň işe girizilmeginiň Türkmenistanyň iri eksport bazary bolan Hytaýy tebigy gaz bilen üpjün ediji hökmünde eýeleýän ornuny has-da berkitmegine garaşylýar.
Käniň dördünji tapgyryny özleşdirmäge badalga berilmegi mynasybetli şu gün geçirilen dabaralar barada TmCars redaksiýasy günüň dowamynda has giňişleýin habar berer.
