Türkmenistanyň Prezidenti Serdar Berdimuhamedow «Türkmengaz» döwlet konserniniň garamagynda hojalyk hasaplaşygyndaky «Galkynyşgaz» kärhanasyny döretmek hakynda Karara gol çekdi. «Watan» habarlar gepleşiginde habar berlişi ýaly, resminama 18-nji aprelde geçirilen Ministrler Kabinetiniň mejlisiniň dowamynda tassyklanyldy.
Täze düzüm potratçy bilen işleri utgaşdyrmak we «Galkynyş» gaz känini senagat taýdan özleşdirmegiň dördünji tapgyrynyň amala aşyrylyşyna gözegçiligi güýçlendirmek maksady bilen döredilýär. Bu tapgyryň çäklerinde «CNPC Amudarya Petroleum Company Ltd» kompaniýasy bilen bilelikde ýylda 10 milliard kub metr harytlyk gazy taýýarlaýan desgalaryň taslamasyny taýýarlamak we gurluşygyny alyp barmak göz öňünde tutulýar.
Gol çekilen resminama döwlet konsernini täze kärhananyň düzgünnamasyny tassyklamaga we onuň netijeli işlemegini üpjün etmäge borçlandyrýar.
Döwlet Baştutany käni özleşdirmegiň dördünji tapgyrynyň başlanmagynyň energetika pudagy üçin taryhy waka bolup durýandygyny belledi.
Serdar Berdimuhamedow wise-premýer Guwanç Agajanowa bu taslama boýunça bellenilen ähli wezipeleriň wagtynda ýerine ýetirilmegini berk gözegçilikde saklamagy tabşyrdy.
