Toyota öz üpjün edijilerine satýan metalynyň bahasyny birden galdyrmak kararyna geldi diýip, Nikkei agentligi habar berýär. Bahalar 20-30% galdyryldy. Nikkei-ň maglumatlaryna görä, Toyota konsernine ätiýaçlyk şaýlaryny öndürýän öndürijiler üçin poladyň bir tonnasy ortaça 40 müň ýene ($289) çenli galdy.
Toyota-nyň Ýaponiýada iň iri polat satyn alyjydygyny bellemelidiris: kompaniýa metaly diňe bir özi üçin däl, eýsem, üpjün edijileri üçin hem satyn alýar. Şonuň üçinem hut Toyota-nyň goýan bahasy däp boýunça diňe awtoulag bazary üçin däl, eýsem, tutuş bazar üçin çelgi hasaplanýar.
Toyota-nyň üpjün edijileri üçin poladyň bahasynyň galmagy bilen, ätiýaçlyk şaýlarynyň hem, kuzowyň bölekleriniň hem gymmatlamagyna garaşybermeli diýip köpler ynam bilen aýdýarlar. Bu bolsa ulaglaryň özüniň hem bahasynyň ýokarlamagyna, diňe bir Toyota kysmynyň däl, eýsem beýleki ýapon öndürijileriniň ulaglarynyň hem gymmatlamagyna sebäp bolar.
