Gazagystanda Ginnesiň täze rekordyny goýmak meýilleşdirilýär. Prodýuser Daut Şaýhislamow iň köp milletli orkestri ýygnajak “Dünýä sazy” taslamasyna başlady.
“Kazinformyň” ýazmagyna görä, rekordyň düýp manysy bir sahnada, bir aýdym-saz toparynda dürli halklardan we milletlerden has köp wekil jemlemekden ybarat. Bu köp milletli orkestr adamlary gözüniň görnüşi, deriniň reňki ýa-da dini boýunça bölmeýän hakyky birleşdiriji sazy ýerine ýetirer. Bu barada centralasia.media belleýär.
“Öňki taslama, “Dünýäniň suraty”, maňa ganat berdi. Men meseläniň maddy däl-de, ýagşy energiýany berýän we bu energiýa bilen paýlaşmaga iterýän ruhy tarapy barada gürrüň edýärin. Täze taslamanyň ideýasy öňden hem bardy, ýöne sentýabr aýynyň ortasynda Gazagystanyň paýtagtynda Dünýä we adaty dinleriň liderleriniň VII gurultaýynyň geçiriljekdigi işe giriziji mehanizm bolup çykyş etdi. Bu global waka Rim papasynyň hem gelmegine garaşylýar. Gazagystanyň esasy şäherine dünýäniň dürli künjeginden dürli dini birleşikleriň wekilleriniň gelmegi we bu ýerde olary köp milletli orkestriň garşylamagy simwolikdir” – diýip, Daut Şaýhislamow aýdýar.
Gatnaşyjylaryň sany heniz mälim edilmedi, ýöne prodýuser ýaşlaryň örän işjeň bolup, eýýäm köp sanly arza tabşyrandygyny belleýär. Prodýuseriň aýtmagyna görä, sazandalaryň haýsy kompozisiýany ýerine ýetirjekdigi barada deslapky ylalaşyk bar.
Çäre 6-njy sentýabra meýilleşdirilip, onuň geçiriljek ýeri hökmünde Parahatçylygyň we ylalaşygyň köşgi saýlandy.
