Hytaýyň Haýnan prowinsiýasynyň häkimiýetleri 2030-njy ýyla çenli däp bolan benzin ýa-da dizel hereketlendirijileri bilen işleýän awtoulaglaryň satuwyny dolulygyna gadagan etmekçi bolýar. Bu baradaky maglumaty autonews.ru paýlaşýar.
“Sinhua” agentliginiň maglumatlaryna görä, eýýäm 2025-nji ýyla çenli döwlet ulaglarynyň ählisi, şol sanda ýük ulaglary we awtobuslar elektrikleşdiriler. Ýene bäş ýyldan bolsa içinden otlanylýan hereketlendirijisi bolan ulaglaryň satuwy gadagan ediler, üstesine, şeýle görnüşli awtoulaglaryň hereketi üçin aýgytly çäklendirmeler giriziler.
Häzirki wagtda Haýnan Hytaýyň benzin we dizel bilen işleýän awtoulaglardan el çekmek barada meýilnamalaryny mälim eden ilkinji prowinsiýasy boldy. Şeýle-de bolsa, ýakyn wagtda ýurduň beýleki sebitleriniň hem Haýnanyň yzyna eýermegi ähtimal.
Ýeri gelende, hytaýly awtomobil öndürijileriň içinden otlanylýan hereketlendirijilerden el çekmek meýilnamasyny goldaýandyklaryny aýtmak gerek. Meselem, “BYD” kompaniýasy eýýäm şeýle görnüşli ulaglary goýbermegi bes etdi. “Great Wall Motor” maşgalasyna girýän “Haval” markasy hem 2030-njy ýyla çenli içinden otlanylýan hereketlendirijili awtoulaglary öndürmekden dolulygyna saklanar.
