Braziliýanyň ýokary saýlaw kazyýeti (TSE) duşenbe güni oktýabr aýynda geçiriljek ählumumy saýlawlarda ýurduň prezidentiniň wezipesine dalaşgärleriň resminamalaryny kabul etmekligi tamamlady. Pudagyň metbugat gullugynyň habar bermegine görä, bu wezipä 12 dalaşgär hödürlendi diýip, TASS ýazýar.
Internet arkaly talap hatlaryny kabul etmek duşenbe güni sagat 08.00-da (17:00) tamamlandy, resminamalary elden we elektron görnüşde sagat 19:00-a (16-njy awgust 04:00) çenli tabşyrmaga rugsat berildi. TSE dalaşgärleriň talap hatlaryna we degişli resminamalaryna seretmeli hem-de 12-nji sentýabrdan gijä galman, olaryň saýlawlara gatnaşyp bilmek mümkinçilikleri babatynda gutarnykly çözgüt çykarmaly.
Ýokary döwlet wezipesi üçin esasy bäsdeşlik Liberal partiýadan hödürlenen, 67 ýaşly konserwator Žair Bolsonaru (ony goldamaklyga «Progressçiler» bilen «Respublikançylar» partiýalary hem goşuldylar) bilen Zähmetkeşler partiýasynyň (RT) baştutany, ýurda 2003-2010-njy ýyllarda prezidentlik eden, 76 ýaşly Luis Inasiu Lula da Silwanyň arasynda ýaýbaňlanmagyna garaşylýar. Ony RT-dan hem başga, çepçi radikallardan başlap sagçy merkezçilere çenli birgiden jemgyýetçilik-syýasy hereketler hem goldaýarlar.
Soňky pikir soraşmalara görä, Lula da Silwanyň ýeňiş gazanmaga mümkinçiligi has ýokary, oňa respondentleriň 45%-i ses bermäge taýýar. Döwletiň häzirki baştutany ondan 11 p.p. yza galýar, onuň yzyndan üçünji bolup 8% goldaw bilen çepçi merkezçi Siru Gomes gelýär.
Braziliýada nobatdaky ählumumy saýlawy 2-nji oktýabrda geçirmek bellendi. Onda prezident, mejlisiň deputatlary we senatorlaryň üçden bir bölegi saýlanar. Ikinji tapgyr (zerur bolanda) 30-njy sentýabrda geçer.
