Özbegistan Türkmenistan we Pakistan bilen awtoulaglarda ýükleri daşamak üçin bilelikdäki ulag kompaniýalaryny döretmegi teklip edýär. Bu barada Yuz.uza salgylanyp, ORIENT habar berýär.
Habarda bellenilişi ýaly, Özbegistanyň Prezidenti Şawkat Mirziýoýew 9-njy awgustda ýörite maslahat geçirip, ýurduň ýolbaşçylary bilen halkara ulag geçelgelerini ösdürmek barada pikir alyşdy we eksport harytlaryny daşarky bazarlara, şol sanda Ýewropa ibermek üçin has amatly ugurlaryň üstünde işlemek boýunça wezipeleri kesgitledi. Şunuň bilen baglylykda, Türkmenistan we Pakistan bilen awtoulaglarda ýükleri daşamak üçin bilelikdäki ulag kompaniýalaryny döretmek teklibi öňe sürüldi.
Ýeri gelende bellesek, Gurbanguly Berdimuhamedowyň geçen ýylyň oktýabrynda Özbegistana amala aşyran resmi saparynyň geçirilen Türkmen-özbek ykdysady forumynda Türkmenistanda awtoulaglaryň, oba hojalyk we tirkeg tehnikalarynyň önümçiligini ýola goýmak maksady bilen, «Turkmenistan-Motors» we «Uzawtosanoat» kompaniýalarynyň arasynda degişli Ähtnama gol çekildi. Bu Ähtnamanyň çäklerinde geljekde
«Turkmenistan-Motors» kompaniýasynyň önümçilik kuwwatlygynda «UzAuto Motors» kompaniýasynyň awtoulag boýunça önümçiligini ýola goýmak babatda Ylalaşyk baglaşmak meýilleşdirilýär.
Kompaniýa ilkinji ýylda 10 müň sany oba hojalyk tehnikasyny we tirkeg öndürmegi meýilleşdirýär, 4-5 ýylyň dowamynda bolsa önümçiligini ýylda 50 müňe çenli artdyrmagy göz öňünde tutýar.
