Italiýanyň sport awtomobillerini öndürijisi Ferrari NV 2022-nji ýylyň ikinji çärýeginde arassa girdejisini 22%, girdejisini 25%, awtomobil satuwyny 29% ýokarlandyrdy. Kompaniýanyň metbugat relizinde habar berlişi ýaly, aprel – iýun aýlarynda onuň arassa girdejisi geçen ýylyň degişli döwründäki 206 mln ýewro bilen deňeşdirilende, 249 mln ýewro boldy diýip, interfax.ru belleýär.
Ikinji çärýekde Ferrari-niň girdejisi 1,04 mlrd ýewrodan 1,29 mlrd ýewro çenli ýokarlandy. Geçen çärýek kompaniýa bir ýyl ozalky 2685 awtomobile garşy 3455 awtomobil satdy. Ferrari Portofino M modelleri we F8 seriýasynyň awtomobilleri uly islegden peýdalandy.
Ýewropany, Ýakyn Gündogary we Afrikany birleşdirýän sebitde satuw geçen çärýek 4,5%, Aziýa-Ýuwaş umman sebitinde 21,4%, Demirgazyk we Günorta Amerikada 62,2% ýokarlandy. Hytaýda, Gonkongda we Taýwanda satylan awtomobilleriň sany tas 2,2 esse (+115,7%) artdy.
Kompaniýa, umuman, 2022-nji ýyl üçin çaklamasyny gowulandyrdy. Ferrari 4,9 mlrd ýewro möçberinde girdeji, 1,7 mlrd ýewrodan 1,73 mlrd ýewro aralygynda düzedilen EBITDA, 1,15 mlrd ýewrodan 1,18 mlrd ýewro aralygynda düzedilen EBIT almagy çaklaýar.
Ferrari-niň paýnamalary Milandaky söwdada 0,9% arzanlaýar. Kompaniýanyň kapitallaşdyrmasy ýylyň başyndan bäri 10%, 50,85 mlrd ýewro çenli azaldy.
