Ýewropada COVID-19 bilen kesellänleriň sany üç esse, hassahana ýerleşdirilenleriň sany iki esse artdy diýip, sişenbe güni BSGG-niň Ýewropa sebiti boýunça edarasynyň direktory Hans Klýuge mälim etdi.
"Ýewropa sebitinde soňky alty hepdäniň dowamynda COVID-19 bilen täze kesellänleriň sany üç esse köpeldi, geçen hepde täze kesellänleriň sanynyň 3 mln töweregi bolandygy habar berlipdi, bu bolsa dünýäde ýüze çykan täze kesellemeleriň ýarsyna deň diýen ýalydyr. Şol döwür içinde koronawirus ýokaşyp hassahana ýerleşdirilenleriň sany iki esse köpeldi, ýöne intensiw terapiýa bölümine ýerleşdirilýänler häzire çenli degişlilikde seýrek bolmagynda galýar " - diýip, Klýuge BSGG-niň saýtynda çap edilen beýannamasynda habar berýär.
Şeýle-de, ol Ýewropada her hepde koronawirus sebäpli 3 müň töweregi adamyň ýogalýandygyny belledi.
Klýugeniň sözlerine görä, häzirki ýagdaý geçen ýylyň şu döwründe ýüze çykan ýagdaýa meňzeşdir, emma o gezek keselçilik "delta" ştammyň hasabyna artypdy, häzir bolsa "omikronyň" bir şahasy sebäpli köpelýär.
Ýewropa güýzki we gyşky ýokanç keselleriň öňünde durmaga kömek bermek üçin BSGG koronawirusa we beýleki ýiti respirator kesellerine garşy göreşmegiň strategiýasyny çykarýar. Onda, esasan, gurama ýurtlara öz saglyk ulgamlaryna düşýän agram artan ýagdaýynda, tizden-tiz hereket etmäge taýýar bolmagy maslahat berýär.
Şeýle-de, BSGG ilata sanjym etmegi güýçlendirmeklige, immuniteti gowşak adamlara ikinji "buster" sanjymyny etmeklige we käbir töwekgel topara girýän adamlara şeýle sanjymy etmek mümkinçiligine garamaklyga, ýapyk binalarda we ulaglarda örtük geýmegi ündemeklige, jaýlary ýelejiredip durmaklyga çagyrýar.
