Janyna kast edilenden soň aradan çykan Ýaponiýanyň öňki premýer-ministri Sindzo Abe Ýaponiýanyň iň abraýly döwlet baýragy – Ýokary Hrizantema ordeni bilen sylaglanar. Bu barada Kyodo agentligi habar berdi diýip, TASS belleýär.
Bellenilişi ýaly, degişli karar ýurduň ministrler kabinetiniň mejlisinde kabul edildi. Abe zynjyrly Ýokary Hrizantema ordeni bilen sylaglanar – Ýaponiýada bu ordeniň şeýle görnüşi daşary ýurtlaryň baştutanlaryndan başgalara diňe aradan çykandan soň berilýär.
Bu ordeniň ömrüň dowamynda alyp bolýan görnüşi – uly lentalydyr. Onuň kawalerleri, aýratynam, imperator Aleksandr II, şa aýaly Ýelizaweta II, britaniýaly şazada Çarlz, Gazagystanyň öňki prezidenti Nursultan Nazarbaýew, ABŞ-nyň öňki prezidenti Ronald Reýgandyr.
