Teslanyň awtoulaglary eýýäm bu ýyl ýollardaky çukurlary "görmegi" we olardan sowlup geçmegi öwrenerler diýip, Electrek portaly ýazýar. Bu proşiwkanyň täze täzelenişi çykanda amal bolar, ony ulag eýeleri bulut ýadyndan ýükläp alyp bilerler.
Awtopilot düzgüninde hereket etjek ulaglar üçin çukurlardan sowlup geçmek we çarkandakly ýollarda seresap gitmek mümkinçiliginiň bolmagy möhümdir. Bu diňe bir podweskany aýamaga mümkinçilik bermän, eýsem, hereket wagtynda ulagdaky sürüjiniň we ýolagçylaryň rahatlygyny üpjün edýär.
Ilon Maskyň baryp-ha 2020-nji ýylda Teslanyň ýollardaky çukurlary "duýup", olardan sowlup geçip biljekdigini aýdandygyny belläliň. Şeýle-de bolsa, şonuň ýaly mümkinçilik diňe 2022-nji ýylda tapgyrly çykýan ulaglara nesip eder. "Teslanyň adaptiw podweskasy ýoluň öňdäki bitekiz ýeri üçin ýol proswetiniň beýikligini sazlaýar. Bu düzleme islendik ýerde bolup geçip biler, sebäbi ulag Teslanyň awtoulaglary tarapyndan döredilen ýol kartasynyň takmyny maglumatlaryny ýükleýär" - diýip, täze proşiwka goşulan belliklerde aýdylýar.
