Counterpoint kompaniýasynyň analitikleri dünýäniň smartfon bazaryndaky ýagdaý barada gürrüň berdiler. Bu barada kompaniýanyň saýtyndaky hasabatda aýdylýar diýip, lenta.ru habar berýär.
Firmanyň hünärmenleriniň aýtmagyna görä, maý aýynda global bazarda smartfon üpjünçiligi 100 mln birlikden aşak düşdi – bu soňky 10 ýylda ikinji gezek bolýar. Üpjünçilik 96 mln gurluşa çenli – aýlyk hasabynda 4 göterim we ýyllyk hasabynda 10 göterim azaldy.
Bazardaky şeýle ýagdaý toplumy düzüjileriň ýetmezçiligi, inflýasiýanyň ýokarlanmagy, Hytaýda önümçiligiň ösüşiniň haýallanmagy we Ukrainadaky çökgünlik bilen baglanyşyklydyr. Analitikler smartfon bazarynyň heniz pandemiýadan öňki derejä ýetmändigini belleýärler. 2021-nji ýylda oňa üpjünçiligiň çäklendirilmegi we koronawirus çäklendirmeleri täsirini ýetirdi.
Hünärmenleriň pikiriçe, smartfon bazaryndaky peselme tutuş tomus dowam eder, ýöne ýagdaý ýylyň ikinji ýarymynda durnuklaşar. Muny Aziýada önümçiligiň kadalaşmagy we täze logistika zynjyrlarynyň ýola goýulmagy bilen baglanyşdyrýarlar.
