Yslam Hyzmatdaşlyk Guramasynyň sessiýasynda Özbegistanda ýerleşýän Hywa şäheri 2024-nji ýylda yslam dünýäsiniň syýahatçylyk paýtagty diýlip yglan edildi. Bu barada respublikanyň Syýahatçylyk ministrliginiň metbugat gullugy habar berýär diýip, centralasia.media belleýär.
Bakuwda geçirilen Yslam Hyzmatdaşlyk Guramasynyň XI sessiýasynda ilkinji gezek Hywany “Yslam dünýäsiniň syýahatçylyk paýtagty” diýip yglan etmek kararyna gelindi. Yslam dünýäsiniň syýahatçylyk paýtagty adyna bäş şäher – Abu-Dabi, Şanliurfa, Lagos, Duşanbe we Hywa dalaş etdi. Soňky ýyl bu şäherleriň arasynda nominasiýada ýeňiş gazanmak ugrunda dartgynly göreş boldy.
Yslam Hyzmatdaşlyk Guramasynyň agzalary Özbegistanyň prezidenti Şawkat Mirziýoýew tarapyndan syýahatçylyk pudagynda geçirilen özgertmeleri – wiza režiminiň ýeňilleşdirilmegini, medeni mirasyň goralyp saklanmagyny we taryhy şäherleriň abadanlaşdyrylmagyny ýeňiş üçin esasy şertler hökmünde ykrar etdiler.
Aýratynam, Hywanyň taryhy keşbini dikeltmek boýunça geçirilen işler, dikeldiş we gorap saklaýyş işleri, syýahatçylar üçin şertleriň döredilmegi, infrastrukturanyň kämilleşdirilmegi, bäş ýyldyzly myhmanhanalaryň, otelleriň gurluşygy bellenilip geçildi.
“Yslam dünýäsiniň syýahatçylyk paýtagty ýylynda Hywa şäherinde Yslam Hyzmatdaşlyk Guramasyna agza 57 döwletiň syýahatçylyk ministrleriniň we syýahatçylyk administrasiýalarynyň ýolbaşçylarynyň mejlisi, Özbegistan Respublikasynda zyýarat syýahatçylygynyň potensialyny açyp görkezýän ylmy konferensiýalar, amaly seminarlar, foto sergiler, art-ekspozisiýalary ýokary derejede guralyp geçiriler. 2018-nji ýylda Özbegistan Respublikasynyň prezidentiniň başlangyjy bilen esaslandyrylan “Ýüpek ýoly” halkara syýahatçylyk we medeni miras uniwersitetiniň bazasynda Yslam Hyzmatdaşlyk Guramasyna agza döwletlerden alymlaryň we gözlegçileriň gatnaşmagynda ylym we bilim pudagynda mümkinçilikleri açyp görkezmäge we giňeltmäge ýardam berýän birnäçe çäreler geçiriler” – diýip, Özbegistanyň wekiliýetiniň ýolbaşçysy, premýer-ministriň orunbasary, Syýahatçylyk we medeni miras ministri Aziz Abduhakimow belledi.
