27-nji iýunda Prezident Serdar Berdimuhamedow Ministrler Kabinetiniň Başlygynyň obasenagat toplumyna gözegçilik edýän orunbasary A.Ýazmyradowyň hem-de welaýatlaryň häkimleriniň gatnaşmagynda sanly ulgam arkaly iş maslahatyny geçirdi.
Sanly ulgam arkaly geçirilýän iş maslahatynda welaýatlaryň häkimleri sebitlerde alnyp barylýan işler, galla oragynyň depginlerini ýokarlandyrmak, orakdan boşan meýdanlarda sürüm geçirmek, gowaça meýdanlarynda ýerine ýetirilýän ideg işleri hem-de gurluşygy alnyp barylýan desgalardaky işleriň ýagdaýy barada hasabat berdiler.
Döwlet Baştutany welaýatlaryň medeni zolaklarynda bar bolan ekerançylyk meýdanlarynyň çägini giňeltmegiň, ýerleriň hasyllylygyny artdyrmak, suwdan tygşytly peýdalanmak maksady bilen, uzak ýaýlalarda we düzlüklerde ekilýän ekinleriň meýdanyny azaltmak meselelerini öwrenmegiň zerurdygyna ünsi çekdi.
Soňra Ministrler Kabinetiniň Başlygynyň orunbasary A.Ýazmyradow ýurdumyzyň ekin meýdanlarynda geçirilýän agrotehniki çäreler barada hasabat berdi. Döwlete tabşyrylan bugdaý hasyly üçin önüm öndürijiler bilen hasaplaşyklar öz wagtynda geçirilýär, sebitlerde galla oragy bilen bir hatarda, gowaça meýdanlarynda ideg işleri alnyp barylýar, oba hojalyk tennikalary we gurallary bökdençsiz işledilýär.
Daşoguz we Lebap welaýatlarynyň şaly meýdanlarynda ideg işleri agrotehnikanyň talaplaryna laýyklykda dowam edýär. Balkan we Mary welaýatlarynda bolsa gant şugundyrynyň ekişi batly depginde dowam edýär. Mundan başga-da, wise-premýer döwlet Baştutanynyň tabşyrygyna laýyklykda, ýerleriň melioratiw ýagdaýyny gowulandyrmak, suw serişdelerini rejeli peýdalanmak işleriniň alnyp barylýandygy barada maglumat berdi.
