Braziliýada koronawirusyň «omikron» ştammynyň täze görnüşi ýüze çykaryldy. Bu barada Folha de Paulo gazeti ýazýar.
Neşiriň berýän maglumatyna görä, ýarawsyz — San Paulu şäherinden üç ýaşly çaga. Agzalan görnüşiň nusgasy ondan üstümizdäki ýylyň 16-njy fewralynda alnypdy.
Barlagyň geçirilen barlaghanasynda habar berişlerine görä, gürrüň «omikronyň» BA.1 bilen BA.2 görnüşleriniň garyşmagyndan dörän mutasiýa barada gidýär. Barlaghanada mutasiýanyň öň dünýäniň hiç bir ýerinde gabat gelmändigini we Gisaidde — 70-den gowrak döwletiň ýokanç hakyndaky genom maglumatlaryny birleşdirýän platformada kataloglaşdyrylmandygyny tassyklaýarlar.
Mutasiýanyň täze rekombinant ştam diýip ykrar edilmegi üçin dürli adamlardan alnan azyndan bäş nusga gerek.
18-nji aprelde Braziliýanyň COVID-19 pandemiýasy sebäpli girizilen adatdan daşary ýagdaý düzgünini ýatyrýandygy habar berildi. Emma, ekspertler ýokanç bilen kesellänleriň sany häli ýaňy-ýakynda azaldy, adatdan daşary ýagdaý düzgünini ýatyrmagyň heniz wagty däl diýip, ýagdaýa baha berýärler.
