Eýranyň nebit gazyp alyş kuwwaty sanksiýadan öňki derejesine ýetdi, özem bu sanksiýalar we ykdysady basyş şertlerinde bolup geçdi. Bu barada Eýranyň milli nebit kompaniýasynyň baş direktory Mohsen Hojaste-Mehr habar berýär diýip, IRNA salgylanýan Trend ýazýar.
Ol Eýranyň nebit eksporty 40% artdy diýip belleýär. "2018-nji ýylda Eýrana garşy täze sanksiýalar girizilmezden öň biziň ýurdumyzyň çig nebiti çykarmak boýunça kuwwaty 3 mln 838 müň barrelden ybaratdy".
Onuň sözlerine görä, Eýranyň çig nebit ätiýaçlygy 157 mlrd barrel töweregidir, gazyň ätiýaçlygy bolsa - 33 trillion kubmetre barabardyr.
Eýranyň prezidenti Ebrahim Raisi owal 2021-nji ýylyň awgustyndan bäri Eýranyň nebit eksportynyň 40 göterim artandygyny mälim edipdi.
