1-4-nji aprelde prezident Serdar Berdimuhamedowyň çakylygy bilen Hindistanyň baştutany Ram Nath Kowind Türkmenistana geler diýip, Hindistanyň DIM-i habar berýär.
Bu Hindistanyň prezidentiniň Türkmenistana taryhda ilkinji saparydyr diýip, maglumatda nygtalýar.
Saparyň dowamynda ýokary derejeli gepleşikleriň geçirilmegine, ikitaraplaýyn we sebit hyzmatdaşlygynyň meseleleriniň ara alnyp maslahatlaşylmagyna garaşylýar. Temalaryň biri Hindistan-Merkezi Aziýa sammitiniň netijeleriniň durmuşa geçirilişini öz içine alar.
Duşuşygyň netijeleri boýunça özara düşünişmek hakyndaky ylalaşyklaryň we memorandumlaryň birgidenine gol çekişmek meýilleşdirilýär.
Şeýle-de, gepleşikleriň biriniň temasy Türkmenistan-Owganystan-Pakistan-Hindistan (TOPH) gaz geçirijisiniň taslamasyny durmuşa geçirmek barada bolup biler.
