Fransiýanyň häzirki prezidenti Emmanuel Makron saýlawlaryň öň ýanyndaky maksatnamasynda Fransiýada pensiýa ýaşyny 65 ýaşa galdyrmalydygyny belleýär diýip, TASS habar berýär.
Mundan başga-da, ol özüniň bäş ýyllyk ygtyýarlygynyň ahyryna çenli ýurduň ilatyny iş bilen doly üpjün etmäge söz berýär.
«Iş bilen doly üpjün et mek ýetip bolmajak sepgit däl. Biz öňdäki bäş ýylyň dowamynda, geçen bäş ýylda eden işlerimizi etsek bolany» diýip, Makron belledi.
Onuň aýdyşyna görä, ýurtda işsizlik soňky bäş ýylyň dowamynda «iň pes derejä çenli azalypdyr»
3-nji martda Makron fransuzlara açyk hatynda döwlet baştutanynyň saýlawlarynda öz kandidaturasyny hödürleýändigini resmi taýdan yglan etdi. Şondan biraz soňrak Fransiýanyň Konstitusion maslahatynyň prezidenti Loran Fabius ýurtda geçjek prezident saýlawlaryna gatnaşjak dalaşgärleriň jemleýji sanawyny okady.
Oňa sosiologlaryň öňünden çaklan, saýlawlara gatnaşmaga sähelçe-de bolsa mümkinçiligi bolan ähli dalaşgärler girizilipdir. Onda ýaryşyň öňbaşçysy, ýurduň häzirki prezidenti Emmanuel Makronyň, gollist zenan, Il-de-Frans sebitiniň Sebit maslahatynyň prezidenti Waleri Pekressiň, «Milli birleşik» partiýasynyň lideri Marin le Peniň, şeýle-de, ultrasagçy publisist Erik Zemmuryň atlary bar.
Fransiýada prezident saýlawlary aprelde geçer we iki tapgyrda — 10-na we 24-ne amala aşyrylar.
